I
Divins vosse banse pitit mamé
Pitit andje å çi doûx sorîre.
Hoûtez vosse mére, alons dwèrmez
Ca dji veûs v'ni l'home ås poussîres,
Sèrez vos oûys il est grand timps
Tinez, li ptit Jésus lès sére
Et Lu ni sèreût nin contint
Si vos fîz dèl pône a vosse mére.
II
Dwèrmez c'est vos qu'est l'pus sûti
Vos l'savez bin 'mi ptit cint mèye'.
Dji sos d'lé vos, dji n'wèsse moti.
Po n'nin toûrmèter vosse somèye.
Pus awoureûs qui l'fils d'on rwè
Vos n'kinoh'rez l'flatrèye amére.
Dizos mès båhes gostez li r'pwès
Alons dwèrmez, houtez vosse mére.
III
Vosse banse n'est ni d'ôr ni d'årdjint
Vos draps n'ont nin l'froufrou dèl sôye
Lès nôbes, lès grands, lè fåssès
djins
Ni v'nèt nin admurer vos djôyes
Mins dè mons i n'eût nou soglot
A vosse naihance qu'est sins mystère
Et tos mès amours sont por vos
Et vos sorîres sont po vosse mére.
IV
Por vos n' s'élîve nin d'vins lès airs
Dès tchants djoyeûx qui dji n'kinohe
Mins v'z'avez por vos lès concerts
Dès ouhês tchantant d'vins les cohes.
Drî lès fils d'grands, dès homes åemés
Rôlet dès oûy's rimpli d'colère
Dismètant qui, por vos, mamé,
I n'årè qu' lès çis di vosse mére.
